ما بقتش حمل زقة

ما بقتش حمل زقة..

زى عود ضعيف..

سهل كسره بنسمة هوا..

زى ورقة شجر..

عدا عليها كل الفصول..

جه الخريف..

دبلت قوى..حزنت قوى..

وماتت على أرض قاسية

مابقاش فى حاجة بتجرحنى..

أصلا مابقاش فى مكان فاضى فيّا لجراح..

ولا حتى حاجة تهمنى..

أصل اللى جاى زى اللى راح..

مابقاش فى سما تضمنى..

من ساعة ما ريشى اتقطع..

واتبقى منه ريشتين..فوق دراعين..

بس بيفكرونى إنى زمان كنت بقدر أطير..

وأقدر أعاند..وأقول للدنيا لأا..

وألمس السما..وأحضن السحاب ويحضننى..

وأضحك للنجوم وأقولها..ماتبعديش عن كدة..

مابقاش فى لون يخصنى..

بس أبيض باهت ..وقع من علبة الألوان زمان..

والكل فاكر انه قادر يدينى الأمان..

وبيحسدونى عليه..

طب على ايه؟!

ده حتى ميت زى صاحبته..

والحزن سايب الأسود وماسك فيه..

مابقتش حمل زقة من حد..

لحسان البرج اللى شايفينه كبير ده يتهد..

مابقتش أنا أنا..

وما بقاش فى قلبى مكان لفرح....ولا لجرح